شعری در وصف مظلومیت مردم یمن
به گزارش خبرگزاری بسیج از نیر، روزبه صمدی شاعر نیریدر اثر « نهروان شیخلاری » به جنایاتی که سعودی ها در حق کودکان و زنان یمنی روا داشته پرداخته است.
گؤرهسن صوبحه قدَر قونچالاریم ساغ قالاجاق؟
گؤرهسن منده کفن بیچمهیه بارماق قالاجاق؟
نه قدر لالهلره داغدا قبیر قازمالییام
بوندان آرتیقدا قازارسام، منه دیرناق قالاجاق؟
شاختادان تیرتیر اسیر نانه کیمین آرزولاریم
بالتا باغلاردا آتین چاپسا، یاشیل تاغ قالاجاق؟
ایلدیریم چالسا اؤزون پنجرهمین شیشهسینه
پرده اود قاپسا بو گولداندا کی یارپاق قالاجاق؟
دئیهسن عرشهده تأثیر ائلهمیر اودلو سسیم
نفسیم گؤیلره یول تاپسا باغیم باغ قالاجاق؟
قوووت آتمیش دئیهسن آغزینا عارسیز کئچیلر
کیشیلر دینمهسه قوللاردا کی قولباق قالاجاق؟
یاراماز بیزلره دونیاده آبیرسیز یاشاماق
کنده دینسیز یول آچان لحظهده یاشماق قالاجاق؟
نه قدرعرضه یازیم ساختا[1] عدالتچیلره
بو عدالت نه قدر یئرده اویونچاق قالاجاق؟
دینسیزین درمانینا دن داشییر دینداشیمیز
نهروان شیخلاری اؤلمزسه، بو تورپاق قالاجاق؟
تاپشیر آلله سن اؤزون دینیوی دین صاحیبینه
نه قدَر کعبه اؤزو مکّهده دوستاق قالاجاق؟
یمنین ظولموله یاقوتلارینی سیندیرانین
دۀ گؤروم اؤز تاجی دایم بئله پارلاق قالاجاق؟
مظلومون آهی یاخیندا یاخاجاقدیر تیفاغین؟
قصری فرعون کاخی تک بایقوشا اویناق قالاجاق؟
اوشاغا، آروادا، مظلوملارا رحم ائتمیهنین
آدی تاریخده یزیدلر کیمی آلچاق قالاجاق؟
گؤزوموز یولدادی تا یار گله بیر جومعه گونو
گون چیخینجاق گؤزوموز قانیله ایسلاق قالاجاق؟
